Волонтеры инициативной группы «Дабрадзеі» передали гуманитарную помощь

Грамадскія аб’яднанні Общество

Валанцёры ініцыятыўнай групы «Дабрадзеі» раённай арганізацыі Беларускага таварыства Чырвонага Крыжа ў чарговы раз наведалі Бабаўнянскую бальніцу сястрынскага догляду.

■ Таццяна Янушка, Марына Гайдзель (у цэнтры) з Нінай Жук (другая справа) і валанцёрамі
■ Таццяна Янушка, Марына Гайдзель (у цэнтры) з Нінай Жук (другая справа) і валанцёрамі

На гэты раз, каб перадаць гуманітарную дапамогу, якую набылі за кошт сродкаў, сабраных падчас дабрачыннай канцэртнай праграмы «Ноты міласэрнасці»і акцыі «Ад сэрца да сэрца». Для 22 пастаяльцаў установы былі закуплены мыючыя і гігіенічныя сродкі, памперсы, пасцельныя рэчы, адзенне. Вельмі неабходна была і інвалідная каляска са спецыяльнымі прыстасаваннямі.

— Мы вельмі ўдзячны ўсім, хто адгукнуўся на нашу прапанову дапамагчы абяздоленым людзям, і артыстам, і гледачам, — адзначае старшыня раённай арганізацыі Беларускага таварыства Чырвонага Крыжа Ніна Жук. — Асаблівыя словы падзякі трэба адрасаваць «Дабрадзеям» (кіраўнік Валянціна Зарамбоўская) за іх бескарыслівую дапамогу ва ўсіх добрых справах. Вельмі радуе тое, што ў нашым раёне жывуць людзі, неабыякавыя да чужой бяды, якія гатовы аддаць часцінку цяпла сваёй душы тым, хто мае ў гэтым патрэбу.

Супрацоўніцтва раённай арганізацыі БТЧК з установамі Капыльскай цэнтральнай раённай бальніцы наладжана даволі цесна і працяглы час. Гэта пацвердзіла намеснік галоўнага ўрача ЦРБ па медыцынскім абслугоўванні насельніцтва Марына Гайдзель. Яна выказала ўдзячнасць, што валанцёры заўсёды сярод тых, каму неабходны значныя ўвага і клопат, — у бальніцы сястрынскага догляду, у аддзяленні паліятыўнай медыцынскай дапамогі і іншых установах. Сапраўды, як адзначыла Марына Іосіфаўна, усмешкі пацыентаў — гэта вялікая ўдзячнасць і Чырвонаму Крыжу, і медработнікам.

— Выказваем словы ўдзячнасці ўсім, хто не забывае пра людзей з няпростымі лёсамі, — гаворыць загадчык бальніцы сястрынскага догляду Таццяна Янушка. — Большасць з іх не могуць рухацца, інваліды І і ІІ групы. Таму прывезеныя сёння прыстасаванні будуць ім вельмі дарэчы. Ад імя ўсіх пацыентаў дзякую за гуманітарную дапамогу. Хачу адзначыць, што вялікую падтрымку неабходнымі рэчамі і падарункамі мы атрымліваем ад настаяцеля і прыхаджан Свята-Троіцкай царквы, што ў Цялядавічах, ад мясцовых жыхароў. Заўсёды рады тым, хто завітае да нас.

Сяргей КОЗЕЛ



Добавить комментарий

Ваш e-mail не будет опубликован. Обязательные поля помечены *