Благодаря команде единомышленников

Новости

4 верасня — Дзень работнікаў нафтавай,  газавай і паліўнай прамысловасці

Капыльскі раён газазабеспячэння займаецца эксплуатацыяй газавых сетак, абслугоўваннем газаразмеркавальных пунктаў, дастаўкай блакітнага паліва ў балонах да абанентаў, выкананнем аварыйных і рабочых заявак, мантажом і дэмантажом  газабалонных установак.

— З прыходам у раён прыроднага газу кожны год памяншаецца выкарыстанне звадкаванага газу, — адзначае начальнік Капыльскага раёна газазабеспячэння Мікалай Варвашэня. — На дадзены момант звыш 30% нашых абанентаў карыстаюцца прыродным газам. У 2016 годзе мы пазбавіліся апошняй рэзервуарнай устаноўкі.

НА ЗДЫМКУ: электраманцёр Ілля Жук са слесарамі Ігарам Садоўскім, Дзмітрыем Сцяпурам, Андрэем Марукіным
НА ЗДЫМКУ: электраманцёр Ілля Жук са слесарамі Ігарам Садоўскім, Дзмітрыем Сцяпурам, Андрэем Марукіным

На Капыльшчыне працягваецца газіфікацыя прыродным газам прыватнага сектара. Сёлета газіфікаваны вёскі Дусаеўшчына, Агароднікі, да канца года блакітнае паліва прый-дзе ў дамы жыхароў Бадзяжоў і Андросаўшчыны, вуліцы Загальскай у Семежаве.

Вядома, што газ нясе не толькі карысць, але пры няправільных і некваліфікаваных дзеяннях можа прынесці і вялікую бяду. Таму на першым плане ў супрацоўнікаў службы знаходзіцца прафілактычная работа па эксплуатацыі газавага абсталявання і прапаганда бяспечнага карыстання газам сярод насельніцтва.

—  За гэты год выдадзена абанентам 170 патрабаванняў па выпраўленні парушэнняў падчас карыстання прыродным газам у быце і больш за 200 — звадкаваным, — працягвае Мікалай Варвашэня. — І нас гэта вельмі хвалюе, бо здараюцца выпадкі абыякавасці нашага насельніцтва да сваёй бяспекі.

Яшчэ адной праблемай з’яўляюцца несвоечасовыя разлікі за спажыты прыродны газ арганізацыямі горада і раёна. Таму прадпрыемства вымушана браць крэдыты, каб пагасіць запазычанасць.

Але нягледзячы на цяжкасці, калектыў, які налічвае 65 чалавек, ажыццяўляе бесперабойнае, безаварыйнае забеспячэнне блакітным палівам. Як адзначае кіраўнік прадпрыемства, у гэтым вялікая заслуга ўсіх працаўнікоў. Менавіта каманда аднадумцаў можа вырашыць задачы, якія стаяць перад ёй.

Сяргей КОЗЕЛ

Фота Паўла ШЭІНА



Добавить комментарий

Ваш адрес email не будет опубликован. Обязательные поля помечены *