Вырашаць праблемы лягчэй разам

Актуально Мясцовы час

У Капыльскім раёне адбыўся абласны семінар-вучоба старшынь раённых Саветаў дэпутатаў Мінскай вобласці на тэму Аб павышэнні эфектыўнасці сумеснай работы органаў тэрыторыі грамадскага самакіравання, сельскага выканаўчага камітэта і падведамасных арганізацый па рашэнні пытанняў жыццезабеспячэння насельніцтва. Асаблівая ўвага дэпутатаў была скіравана на правядзенне планёрак, іх эфектыўнасць у вырашэнні шырокага спектра пытанняў, якія ўзнікаюць у рабоце сельвыканкамаў.

Семінар адкрылі С. Герасімовіч (у цэнтры), М. Сандрозд і А. Жданеня

У адміністрацыйным будынку ААТ “Старыца-Агра” Слабада-Кучынскага сельсавета ўдзельнікаў форуму віталі старшыня Мінскага абласнога Савета дэпутатаў Святлана Герасімовіч і старшыня раённага Савета дэпутатаў Марыя Сандрозд. У адкрыцці семінара прыняў удзел старшыня райвыканкама Анатоль Жданеня. Ён пазнаёміў прысутных з сацыяльна-эканамічным развіццём раёна, расказаў пра яго перспектывы.

Ужо ў Пацейкаўскім сельсавеце народныя выбраннікі даведаліся пра арганізацыю і правядзенне планёрак старшынёй сельвыканкама Генадзем Лопухам з кіраўнікамі арганізацый і ўстаноў, размешчаных на тэрыторыі сельсавета. Удзельнікі семінара-вучобы пазнаёміліся з ходам выканання мерапрыемстваў па добраўпарадкаванні населеных пунктаў, работай з пустуючымі сядзібамі і па навядзенні парадку на зямлі. Асабліва старшыняў райсаветаў дэпутатаў зацікавіў праект парку ў аграгарадку і яго рэалізацыя. Пра гэта падрабязна расказаў аўтар праекта мастак Уладзімір Швайбовіч. Шэраг пытанняў быў адрасаваны і ўчастковаму інспектару міліцыі старшаму лейтэнанту Вячаславу Паўловічу па аператыўным становішчы, прыёме грамадзян. Святлана Герасімовіч адзначыла плённую працу актыву сельвыканкама і падкрэсліла, што калі яна і надалей будзе праводзіцца — вынік не прымусіць сябе доўга чакаць.

У. Швайбовіч

Не менш актуальным стаў вопыт правядзення планёрак са старэйшынамі вёсак, які склаўся ў Капыльскім сельвыканкаме. Яго кіраўнік Вольга Купрыенка адзначыла, што такая работа праводзіцца ўжо даўно, таму, калі прыйшла на пасаду старшыні, гэту традыцыю не пакінула без увагі. Цяпер старэйшыны – першыя памочнікі, якія здольныя сумесна з сельвыканкамам вырашаць праблемы сваёй вёскі, кожнага чалавека. Пра работу дома сацыяльных паслуг у в. Чырвоны Партызан расказала яго загадчыца Настасся Сянчук.

У якасці экскурсіі прайшло азнаямленне з тэрыторыяй Доктаравіцкага і Блеўчыцкага сельсаветаў.

Як добраўпарадкоўваюцца аграгарадок Цімкавічы і тэрыторыі іншых населеных пунктаў у выніку сумеснай работы органаў тэрытарыяльнага грамадскага самакіравання, сельвыканкама і падведамасных арганізацый, распавяла старшыня сельвыканкама  Алена Острыкава. Удзельнікаў семінара зацікавіў вопыт работы КУП “Цімкаўлянка”, якое аказвае насельніцтву шырокі спектр паслуг. Стала цікавым і выступленне Алены Мечыславаўны, падмацаваны дэманстрацыяй слайдаў, пра арганізацыю вольнага часу жыхароў сельсавета, добраўпарадкаванне грамадзянскіх могілак.

Планёрка ў Пацейкаўскім сельвыканкаме

На пленарным пасяджэнні сваімі назіраннямі ад убачанага падзяліліся старшыні Пухавіцкага, Мядзельскага раённых Саветаў дэпутатаў Юрый Шапавалаў, Алег Бараўко і іншыя. Яны адзначылі важную ролю планёрак у арганізацыі жыццезабеспячэння насельніцтва. Гэта работа дае добры вынік: існуе станоўчая дынаміка ў навядзенні парадку на зямлі, у працы са старэйшынамі і з сельскімі жыхарамі. Святлана Герасімовіч адзначыла таксама, што ў раёне добра пастаўлена работа з кадрамі, ёсць канкрэтнасць ва ўзаемадзеянні з кіраўнікамі прадпрыемстваў, арганізацый.

У цэлым работа раённага Савета дэпутатаў атрымала станоўчую адзнаку. Старшыня Мінскага абласнога Савета дэпутатаў падкрэсліла: важна, што ёсць цеснае ўзаемадзеянне і паразуменне дэпутацкага корпусу з выканаўчай уладай.

Сяргей ЛАЗОЎСКІ


 



Добавить комментарий

Ваш адрес email не будет опубликован. Обязательные поля помечены *