На мой погляд, трэба пачаць з каралевы сезона — капусты. Яе квасяць многія гаспадыні, але не заўсёды яна ў іх атрымліваецца. Прычын для гэтага шмат. Каб капуста ўдалася, рабіць гэта трэба, як кажуць у народзе, пасля Пакроваў, а яшчэ лепш тады, калі наступяць восеньскія халады, расказвае Сяргей Козел.
Сяргей Козел
■ Для квашання неабходна выкарыстоўваць толькі белыя і цвёрдыя качаны познаспелых сартоў.
■ Смачная капуста атрымліваецца толькі ў драўляных бочках або ў эмаліраваным адмысловым посудзе.
■ Пры шаткаванні абавязкова трэба здымаць верхняе зялёнае і пашкоджанае лісце, выдаляць храпку — яна заўсёды дае горыч.
■ Важна дробна нашаткаваць або пасекчы качан, а моркву нарэзаць тонкімі кружочкамі або надзерці на буйной тарцы ў выглядзе тонкіх палосак. Чым больш морквы, тым смачнейшай будзе капуста.
■ Важна не перасаліць капусту. Соль заўсёды трэба дадаваць на смак.
■ На дно ёмістасці або тары не забываем пакласці кавалачкі чорнага хлеба, загорнутыя ў капуснае лісце.
■ Асаблівы смак капусце надаюць антонаўскія яблыкі, а дакладней яблык «Антонаўка». А яшчэ добра дадаваць у капусту журавіны або брусніцы.
■ Нельга пераціраць капусту з соллю — яна тады не будзе хрумсткай. Капусту, змешаную з морквай і соллю, трэба ўкладваць пластамі і ўтрамбоўваць кулаком або драўляным таўкачыкам да выдзялення соку. Першы (горкі) сок павінен сцячы, таму капусту ў тару кладзём горкай і накрываем драўляным кружком з лёгкім цяжарам.
■ Першыя 2-3 дні трэба вытрымаць капусту да браджэння пры тэмпературы +18-20 градусаў. Для паляпшэння смаку і водару мы яе штодня пратыкаем (да дна) завостранай драўлянай круглай палкай. Пену, якая з’явілася, выдаляем.
■ На 10 кг капусты (на практыцы) спатрэбіцца: солі — 100-150 г, морквы і яблыкаў — па паўкілаграма, журавін або брусніц — па 100-150 г.
А яшчэ мы прапануем вось такі дамашні рэцэпт квашання капусты на зіму.
Нашаткаваную капусту змешваем з морквай, надзёртай на карэйскай тарцы, з дабаўленнем вострых прыпраў (кропу або кмену). Усё добра перамешваем, але не пераціраем. Шчыльна ўкладваем у 3-літровыя слоікі (да гарлавіны). Заліваем адным літрам халоднай негатаванай вады. Дадаём у кожны слоік па 3 ст. лыжкі (без верху) цукру і па 2 ст. лыжкі солі, таксама без верху. Дадаючы соль і цукар, трэба іх змяшаць паміж сабой. Затым закрываем слоік капронавай трывалай накрыўкай, папярэдне нагрэўшы яе ў цёплай вадзе. Накрыўкі неабходна выкарыстоўваць двайныя і пажадана новыя. Закаркаваныя слоікі змяшчаем у цёмнае, халаднаватае месца ў кватэры, а яшчэ лепш на ўцеплены балкон ці ў склеп (для падстрахоўкі паставіўшы ў пасудзіны)!
Курыная печань з яблыкамі
Страва, якую не сорамна прыгатаваць і падаць на святочны стол або папросту парадаваць сябе і сваю сям’ю ў любы дзень, незалежна ад пары года.
Спатрэбіцца: печань курыная — 0,5 кг; цыбуля рэпчатая сярэдняга памеру — 2 шт.; яблыкі сярэдняга памеру — 2 шт.; алей — 2 ст. л.; соль і молаты чорны перац — на смак; грэцкі арэх — жменя; разынкі — жменя; воцат яблычны — 2 ст. л.; размарын — 3-4 галінкі.
Печань старанна вымыць пад вельмі халоднай праточнай вадой. Добра зачысціць і прасушыць пры дапамозе папяровага ручніка. Соль змяшаць з перцам і нацерці кавалачкі печані. На разагрэтай патэльні абсмажыць печань з кожнага боку прыкладна па хвіліне, затым перакласці на талерку і на гэтай жа патэльні абсмажыць дробна нарэзаную цыбулю і долькі яблыкаў. Затым дадаць воцат, разынкі, дробна нарэзаны размарын і здробненыя арэхі. Акуратна змяшаць і дадаць печань, гатаваць 6-7 хвілін. Затым накрыць і пратушыць 1-2 хвіліны, пасля даць настояцца 5-10 хвілін. Пры жаданні перад падачай пасыпаць свежым зяленівам.
Для гаспадара аграсядзібы з аг. Пацейкі Яўгена Давыдзенкі кухонныя справы з’яўляюцца адным з самых любімых заняткаў. Асабліва, што датычыцца прыгатавання на свежым паветры. Вось і зараз ён прапануе да вашай увагі.
Яўген Давыдзенка
Хрумсткі багет з запечаным часнаком
Неабходна: 1 багет, 2 галоўкі часнаку, соль, перац па гусце, пятрушка, аліўкавы алей.
Ачысціць часнок ад шалупіння. Разрэзаць яго напалову, паліць аліўкавым алеем, пасыпаць соллю і абгарнуць фольгай. Паставіць запякаць у духоўку на 35 хвілін пры 200 градусах.
У асобную талерку дробна нарэзаць пятрушку, дадаць соль, перац і мякаць прыгатаванага часнаку. Усё старанна змяшаць. Багет разрэзаць на 2 часткі і нацерці часночной сумессю.
Ставім запякацца ў разагрэтую духоўку на 10 хвілін на 180 градусаў.
Шампіньёны ў беконе на мангале
Для гэтага спатрэбяцца: шампіньёны, бекон, тварожны сыр.
У шампіньёнаў аддзяліць ножкі. У капялюшык грыба ўкласці тварожны сыр. Пры жаданні ножкі грыбоў можна нарэзаць і змяшаць з сырам. Кожны грыб загарнуць у бекон. Фаршыраваныя шампіньёны выкладзіце на рашотку і адпраўце на мангал. Абсмажвайце шампіньёны да залацістай скарыначкі з кожнага боку.
А вось урач Капыльскай ЦРБ Аляксандр Гайдзель, які пражывае ў аг. Скабін, любіць эксперыметаваць у прыгатаванні шашлыкоў. Адным з рэцэптаў ён сёння дзеліцца з намі.
Аляксандр Гайдзель
Курыныя крылцы ў апельсінава-соевым марынадзе
Для гатавання спатрэбяцца наступныя прадукты: апельсін, курыныя крылцы, соевая падліўка, мёд, воцат, сланечнікавы алей, сумесь італьянскай травы, часнок, соль і перац чорны молаты.
Выціскаем сок і націраем цэдру ў міску з аднаго апельсіна сярэдняга памеру. Да апельсінавага соку дадаём 90 г соевай падліўкі. Кладзём адну сталовую лыжку мёду. Наліваем адну сталовую лыжку рафінаванага сланечнікавага алею. Дадаём адну сталовую лыжку 9% воцату і два здробненыя зубчыкі часнаку. Кладзём сумесь сухіх траў, звычайна італьянскіх (досыць адной чайнай лыжкі).
Затым змешваем апельсінавы сок, мёд, воцат, соевую падліўку, сланечнікавы алей, часнок і сумесь італьянскіх траў. Апельсінавы марынад гатовы.
Вымытых 700 г курыных крылцаў солім і перчым па гусце, заліваем апельсінавым марынадам. Пакідаем мінімум на гадзіну, але можна і больш, будзе толькі лепш.
Курыныя крылцы выкладваем на сетку грыль або ў форму для запякання і ставім у духоўку. Запякаем крылцы 30-35 хвілін пры тэмпературы 180-185 градусаў С.
Скумбрыя з воцатам і алеем
Неабходна: 2 скумбрыі, 3 ст. л. солі, 1 ч. л. цукру, 50 мл сланечнікавага алею, 2 ст. л. 9% воцату, 2 цыбуліны, 2 шт. лаўровага лісту, 5 шт. чорнага перцу.
Рыбу пачысціць і парэзаць на кавалкі, пасыпаць сумессю солі і цукру і пакінуць на 10 хвілін. За гэты час абабраць цыбулю, нарэзаць паўкольцамі. Змяшаць алей з воцатам, перцам, здробненым лаўровым лістом.
Рыбу кладзём у кантэйнер альбо ў шкляны слоік, шчыльна перакладваючы цыбуляй. Заліваем сумессю алея і воцату. Шчыльна закрываем посуд і ставім у халадзільнік. Спрабаваць салёную скумбрыю па гэтым рэцэпце можна ўжо пра 2 гадзіны.
Падрыхтаваў Сяргей КОЗЕЛ
Паважаныя мужчыны! Калі вы маеце цікавыя рэцэпты, дасылайце! Абавязкова паспрабуем!
Комментарии