Морква вельмі салодкая, вітамінная,усім карысная і любімая…

Актуально Общество

Звыклая для беларусаў морква – з’яўляецца ў Еўропе другой па папулярнасці гароднінай пасля бульбы. Яе любяць дарослыя і дзеці. Яна выкарыстоўваецца ў прыгатаванні салатаў, гарачых і першых страў, а таксама ўжываецца ў сырым выглядзе. Усе ведаюць, што морква багатая на комплекс вітамінаў, але ёсць іншыя цікавыя пра яе факты.

Не заўсёды была аранжавай

Першая морква, якую выявіў старажытны чалавек, была… фіялетавага колеру. Яе сталі вырошчваць з-за духмянага насення і зеляніны, паколькі ўжываць у ежу сам караняплод было нельга з-за яго моцнай горычы. З часам яго ўдалося зрабіць салодкім. Пазней з’явіліся чырвоныя, жоўтыя і нават белыя сарты морквы. А аранжавай яна стала толькі ў XVII стагоддзі.

Такая некарэйская карэйская морква

Карэйская морква не толькі не была вынайдзеная ў Карэі: там яе нячаста можна сустрэць. Прыдумалі гэту страву ў СССР. За аснову была ўзята традыцыйная карэйская страва кімчы – капуста з вострай прыправай. Аднак, паколькі ў СССР неабходную па рэцэпце пекінскую капусту дастаць было складана, у страву сталі дадаваць моркву. З часам морква цалкам выцесніла капусту, і засталася толькі морква з вострай прыправай і часнаком.

Свой фестываль

У каліфарнійскім мястэчку Холтвіль штогод праходзіць фестываль морквы. Кожны люты на працягу цэлага тыдня па горадзе ідуць парады платформаў, упрыгожаных морквай. Гараджане могуць паспаборнічаць у гатаванні лепшай стравы з морквы або пасачыць за кулінарнымі паядынкамі профі. Акрамя таго, тут праходзяць спаборніцтвы, у якіх караняплод выкарыстоўваюць замест спартыўных снарадаў, і многае іншае.

Далікатэс і лекі ад хвароб

Адразу пасля селекцыі аранжавай морквы сорта «Карацель» у XVII стагоддзі моркву сталі вырошчваць ва ўсіх краінах. Тады ж з’явіліся знакамітыя французскія маркоўныя соусы, якія падавалі ў дарагіх рэстаранах. Лекары выкарыстоўвалі як лекі моркву ў мёдзе. Яна доўга захоўвала вітаміны і разам з мёдам лячыла ад шматлікіх захворванняў. Многія стагоддзі таму моркву выкарыстоўвалі ў якасці зубной шчоткі, і гэта сапраўды працавала. Калі грызці цвёрды плод, то зубная эмаль лёгка ачысціцца ад налёту і мікробаў, а таксама гэты працэс дазваляе масажаваць дзясны і прадухіляць розныя стаматалагічныя захворванні. Усім вядомая загадка пра моркву: «сядзіць красна дзяўчына ў вязніцы, а каса на вуліцы». Але «красна», як вы разумееце, гэта не толькі колер, але і прыгажосць. І гэты эпітэт таксама не для чырвонага слоўца. Не дарма ж вітамін А яшчэ называюць «вітамінам прыгажосці». Калі рэгулярна ўжываць свежапрыгатаваны маркоўны сок, твар будзе мець здаровы, квітнеючы выгляд. Таксама морква паляпшае стан валасоў і пазногцяў.

Маркоўныя катлеты

Спатрэбіцца: морква вялікая – 600 г, мука пшанічная – 100 г, яйкі – 3 шт., соль – 1 дробка, алей (для смажання) – 30-50 г.Моркву нацерці на буйнай тарцы, дадаць 3 узбітых яйкі, муку і соль, перамяшаць. Сталовай лыжкай выкласці катлеты ў патэльню. Гатаваць трэба на невялікім агні да залацістага колеру хвілін 4-5.

Пясочнае пячэнне

Морква – 250 г, масла сметанковае (размякчанае) – 100 г, мука – 350-400 г (3 шклянкі па 200 мл), цукар – 150 г, разрыхляльнік для цеста – 2 ч.л. Моркву чысцім і націраем на самай дробнай тарцы, высыпаем цукар і дадаём размякчанае сметанковае масла, перамешваем. 2-3 сталовыя лыжкі мукі адсыпаем у місачку. Астатнія 350 г мукі змешваем з разрыхляльнікам і прасейваем на маркоўную аснову. Хутка вымешваем цеста, пры неабходнасці дадаём астатнюю муку. З атрыманага цеста рукамі, змочанымі ў вадзе, фармуем шарыкі памерам з буйны грэцкі арэх. Бляху засцілаем пергаментам і выкладваем туды шарыкі, адпраўляем у разагрэтую да 180 градусаў духоўку і выпякаем 20-25 хвілін.

Закусачны рулет з сырам і крабавымі палачкамі

Морква – 400 г, яйкі – 3 шт., сыр цвёрды – 100 г, масла сметанковае – 80 г, крабавыя палачкі – 50 г, кроп і пятрушка свежыя – 2 галінкі, маянэз – 30 г, алей – 1 ч.л, соль – 1/3 ч.л. Моркву нацерці на дробнай тарцы. У патэльні растапіць масла, выкласці туды моркву і тушыць на павольным агні 5 хвілін, памешваючы. Давесці да мяккасці. Гатовую моркву астудзіць. Аддзяліць жаўткі ад бялкоў, дадаць кроп і соль. Да бялкоў дадаць солі і ўзбіць. Яечныя жаўткі і бялкі ўліць у маркоўную масу, акуратна змяшаць. Маркоўную сумесь выкласці роўным пластом на пергамент, змазаны алеем, корж выпякаць у духоўцы 15 хвілін. Прыгатаваць начынку. Для гэтага крабавыя палачкі і зеляніну дробна нарэзаць. Сыр нацерці на дробнай тарцы. Здробненыя інгрэдыенты заправіць маянэзам. Выпечанаму маркоўнаму каржу даць астыць. Пакласці начынку і згарнуць у рулет. Адрэзаць неабходную колькасць харчовай плёнкі і абгарнуць рулет, затым прыбраць у халадзільнік на 2 гадзіны. Для разнастайнасці можна змяняць начынку: крабавыя палачкі крэветкамі або чырвонай рыбай.

Посныя аладкі

Манныя крупы – 160 г, мука пшанічная – 50 г, цёплая вада – 250 г, морква – 80 г, цукар – 1 ст.л., соль, дрожджы сухія – 1 ч.л., алей – для смажання. Адмерайце ў глыбокую міску неабходную колькасць манных круп, мукі, дадайце соль і цукар, а таксама няпоўную лыжку дрожджаў. Уліце цёплую ваду. Змяшайце цеста да аднароднасці. Накрыйце міску з цестам харчовай плёнкай без доступу паветра і адпраўце ў цёплае месца на 30 хвілін. А пакуль натрыце моркву на тарцы тоненькай саломкай. Праз час манныя крупы набухнуць, а цеста значна павялічыцца ў памерах. Перакладзіце ў цеста нацёртую моркву. Акуратна змяшайце і дайце цесту яшчэ некалькі хвілін пастаяць. Аладкі выпякаць на ўмераным агні. Падавайце з варэннем або салодкімі сіропамі.

Святочная салата

Курынае філе (адварное або вэнджанае) – 250 г, шампіньёны марынаваныя – 250 г, сыр цвёрды – 150 г, арэхі грэцкія – 10 шт., бульба – 2-3 шт., морква – 2 шт., яйкі – 4 шт., маянэз – 300 г, соль і перац молаты – на смак. Бульбу, моркву, яйкі адварваем і чысцім. Курынае мяса рэжам дробнымі кавалачкамі. Арэхі здрабняем качалкай. Марынаваныя грыбы парэзаць. Першы пласт – палова ўсёй морквы. Затым па чарзе палова сыру, яек і бульбы. Пры жаданні пласты можна пасаліць і паперчыць. Змазаць маянэзам. Выкладваем пласт грыбоў. Пасыпаем арэхамі. Паўтараем пласты ў зваротным парадку: бульба, яйкі, маянэз, сыр і морква. Святочную салату ставім на ноч у халадзільнік, каб добра набралася маянэзам.

Мінтай з морквай і цыбуляй

Мінтай – 800 г, морква – 2 шт., цыбуля рэпчатая – 2 шт., алей – 30 мл, паста таматная – 2 ст.л., вада або чырвонае віно – 50 мл, соль і перац – на смак, часнок – 2 зубкі. Моркву можна нацерці на звычайнай тарцы або на тарцы для карэйскай морквы. Цыбулю і моркву абсмажыць і дадаць таматную пасту, уліць віно ці ваду. Соль і перац таксама будуць дарэчы. Тушым 3 хвіліны, і соус гатовы. Рыбу чысцім, абразаем плаўнікі, рэжам на кавалкі. Калі ёсць ікра, то яе таксама запячом з рыбай. На дно формы для запякання наліваем трохі алею, выкладзем палову гародніны і нарэзаны часнок. На гародніну выкладваем кавалачкі рыбы. Закрыем усё другой паловай гародніны. Накрыем форму фольгай і ставім у духоўку на 45 хвілін пры 220 градусах. Падаём з зелянінай.

Падрыхтавала Таццяна БОХАН



Добавить комментарий

Ваш адрес email не будет опубликован. Обязательные поля помечены *